(page no.3) 
aao chale mere nabi ﷺ ke sunnato pe-
rasoolullah
sallallahu alaihi wasallam ne zindagi ke har subah mein jo taaleemaat aur
hidaayaat di hain aur aap ne jo kuch kar ke dikhaaya hai, usi ka naam sunnat
hai. Islaam mein sunnat ki kya ehmiyat aur qeemat hai, duniya wa aakhirat mein
us ka kya faaida hai, aur us ke taalluq se hamaara amal kaisa hai? in sab
cheezon ke baare mein ajj mukhtasar taur par chand baatein zikr ki ja rahi
hain.
1- Sirf Rasoolullah
sallallahu alaihi wasallam par imaan lana hi kaafi nahin hai balke aap ki
shariat wa sunnat ko apnaana bhi zaroori hai :
Allah Ta’ala ki taraf
se jo Rasool bheja jata hai, us per sirf imaan le aana hi kaafi nahin hai,
balke zindagi guzaarne ke liye jo tareeqa, jo qaanoon wa dastoor aur tahzeeb wa
tamaddun le kar aata hai, duniya ke saare tareeqon ko chhod kar sirf usi par
amal karna zaroori hota hai. Aur jo aadmi aisa nahin karta use samajh lena
chaahiye ke mahaz dil se imaan le aana mukammal najaat ke liye kaafi nahin hai.
Quraan e kareem mein Allah Ta’ala farmaate hain aur humne koi Rasool is ke siwa
aur maqsad ke liye nahin bheja ke Allah ka hukm maan kar us ki ita’at ki jaaye.
2- Jis ne Rasoolullah
sallallahu alaihi wasallam ke bataaye huwe tareekqe par amal kiya woh jannat
mein jaayega :
Ek hadees mein
Rasoolullah sallallahu alaiohi wasallam ne farmaaya : meri poori ummat jannat
mein jaayege , uske ke jisne inkaar kiya. Arz kiya gaya ke ya Rasoolullah
sallallahu alaihi wasallam! inkaar karne waale kaun log hain? Aap sallallahu
alaihi wasallam ne farmaaya : jisne meri ita’at wa farmaanbardaari ki woh
jannat mein jaayega aur jisne meri baat nahin maani aur meri naafarmaani ki usne
inkaar kiya.
Hadees ka matlab yeh
hai jo aadmi Nabi sallallahu alaihi wasallam ki shareeat wa sunnat ko
apnaayega, aap ke bataaye huwe tareeqe ke mutaabiq apni zindagi guzaarega aur
aap ke hukum par chalega, jannat mein jaayega aur jo aap ki shareeat wa sunnat
se munh modega, aap ki naafarmaani karega aur aap ke bataaye huwe tareeqe se
har kar zindagi guzaarega, woh jannatmein ja sakega, goya usne apne bure amal
se khud hi jannat mein jaane se inkaar kar diya.
3- Rasoolullah
sallallahu alaihi wasallam ki zindagi tamaam musalmaanon ke liye namoona hai :
Rasoolullah
sallallahu alaihi wasallam ki paakeeza zindagi aur app ki taaleemaat tamaam
musalmaanon ke liye namoona aur adrash hai, is duniya mein unse behtar koi
namoona wa adrash na hai aur na ho sakta hai. Khud Allah Ta’ala ne is ki
wazaahat farmaadi hai. Quraan e kareem Allah Ta’ala farmaate hain : haqeeqat
yeh hai ke tumhaare liye Rasoolullah sallallahu alaihi wasallam kizaat mein ek
behtareen namoona maujood hai, har us shakhs ke liye jo Allah se aur yaume
aakhirat se ummeed rakhta ho aur kasrat se Allah ka zikr karta ho.
4- Quraan aur
Rasoolullah sallallahu alaihi wasallam ki sunnat ki perwi; gumraahi aur
ikhtilaafaat se bachne ka zariya hai :
Aaj ham jis daurse
guzar rahe hain woh fitne aur ikhtilaafaat ka daur hai; har taraf gumraahi aur
bedeeni ki hawaaein chal rahi hain, is bhayaanak daur mein jo aadmi
ikhtilaafaat aur fitnon se mehfooz rahna chaahta hai aur gumraahi wa bedeeni se
bachna chaahta hai, use quraan e kareem ki hidaayat aur Rasoolullah sallallahu
alaihi wasallam aur khulfa e raashideen ki sunnat ko mazbooti se thame rakhna
chaahiye aur unpar amal karna chaahiye. Rasoolullah sallallahu alaihi wasallam
ne farmaaya : mein me 2 cheezein tumhaare darmiyaan chhodi hain, tum jab tak un
donon ko mazbooti se thaame rahoge, kabhi gumraah na hoge, ek kitaabullah yaani
quraan e kareem aur doosri rasool ki sunnat.
Ek doosri hadees mein
poori ummat ko naseehat karte huwe Rasoolullah sallallahu alaihi wasallam ne
farmaaya : mein tum ko wasiyat karta hoon Allah se darne aur hukm sunne aur
maan ne ki, chaahe wo koi habshi gulaam hi kyun na ho, is liye ke tum mein se
jo mere baad zinda rahega woh bade ikhtilaafaat dekhega, (aisi haalat mein) tum
apne upar mere tareeqe aur hidaayat yaafta khulfa e raashideen ke tareeqe ko
laazim kar lena, us ko mazbooti se thaam lena aur daanton se ou ko pakad lena.
5-kaamil musalmaan
wohi hai jo Aap sallallahu alaihi wasallam ki hidaayat wa raaleem ke mutaabiq
zindagi guzaarta hai :
Insaan duniya ki
ranga rangi aur chamak damak ko dekh kar us ke peechhe bhagne lagta hai, woh
nafs aur khwaahish ka gulaam ban jata hai aur dil mein jo aata hai wohi karta
hai, yeh ek sachche pakke musalmaan ki alaamat nahin hai. Sachcha pakka
musalmaan woh hai jo apni khwaahish aur chaahat ko daba kar Rasoolullah
sallallahu alaihi wasallam ki sunnat aur tareeqe ko apnaaye, usi ke mutaabiq
apni poori zindagi guzaare, yahaan tak ke woh sunnat aur tareeqa uski fitrat
mein daakhil ho jaaye. Isi taraf ishara karte huwe Rasoolullah sallallahu
alaihi wasallam ne farmaaya : Tum mein se koi momin nahin ho sakta, jabtak ke
us ki khwaahishaat meri laayi huwi hidaayat aur taaleem ke tabe’na ho jaayein.
6- Nabi Rasoolullah
sallallahu alaihi wasallam ki kisi miti huwi sunnat ko zinda karne ka bahot ajr
wa sawaab hai :
Kabhi aisa bhi hota
hai ke Rasoolullah sallallahu alaihi wasallam ki koi sunnat lamba zamaana
guzarne ki wajah se logon ke zehnon se nikal jaati hai, kisi ka us par amal
nahin hota, goya muaashre se woh sunnat mit chuki hoti hai, aisi soorate haal
mein agar koi shakhs us sunnat ko zinda karne ki koshish karta hai, khud us par
amal karta hai aur doosron ko amal par ubhaarta hai, to us aadmi ko khud amal
karne ka sawaab milega hi, saath mein jitne log us par amal kareinge, un tamaan
logon ka bhi us ko sawaab milega. Is liye aisi sunnaton ko talaash kar ke amal
karna aur karaana chaahiye. Rasoolullah sallallahu alaihi wasallam ne farmaaya
: jis ne meri koi sunnat zinda ki, jo mere baad khatm kar di gayithi, to us
shakhs ko un tamaam logon ke baraabar ajr wa sawaab milega, jo uspar amal
karein , bagair uske ke un amal karne waalon ke ajr wa sawaab mein kuch kami ki
jaaye.
7- Rasoolullah
sallallahu alaihi wasallam ki sunnat par amal karne ke liye Aap ke laaye huwe
ilm ko seekhna zaroori hai :
Jab Allah ke Nabi
Rasoolullah sallallahu alaihi wasallam par imaan laaye hain aur aap ki ita’at
wa farmaanbardaari ka ahad kar chuke hain, to hamaare liye yeh zaroori ho gaya
ke ham sab se pehle yeh jaan ne ki koshish karein ke Aap sallallahu alaihi
wasallam ki kya taaleemaat aur hiddyat hain, Aap sallallahu alaihi wasallam kin
baaton ko karne ka hukm dete hain aur kin baaton se mana karte hain? usi ka
naam ilme deen hai. Yahi wajah hai ke Aap sallallahu alaihi wasallam ne tamaam
logon ko ilme deen seekhne ki hidaayat di hai aur us ke fazaail bayaan farmaaye
hain, ek hadees mein Aap sallallahu alaihi wasallam ne Hazrat Abu Zar
Radihiallahu Anhu se farmaaya : Aye Abu Zar! tum subha ja kar Quraan ki ek
aayat seekh lo, yeh tumhaare liye 100 rakaat (nafil) namaaz padhne se behtar
hai aur subha jakar ilm ka ek mazmoon seekh lo, khwaah filhaal uspar amal ho ya
na ho, yeh 100 riakaat (nafil) namaaz padhne se behtar hai.
8- Ummat ki bigaad ke
waqt sunnat par amal karne se shaheed ka sawaab milega :
Aaj ham Rasoolullah
sallallahu alaihi wasallam ki sunnat ko bahot maamooli samajh kar chhod dere
hain, ibaadat wa bandagi, rahen sahen, libaas wa poshhaak, khane peene, aadat
wa akhlaaq, tijaarat wa muaamlaat, garz kisi cheez meinbhi Aap sallallahu alaihi
wasallam ki sunnat ko kuch ehmiyat nahin dete, aur sath mein kehte hain ke aaj
ke is fasaad aur bigaad waale maahaul mein in sab cheezon par amal karna bahot
mushkil hai. Yaad rakhiye ke hamaari yeh soch galat hai aur yeh hamaara bahot
bada jurm hai, saath hi ham bade ajr wa sawaab se bhi mahroom ho eahe hain,
kyun ke aise hi maahaul mein sunnat par amal karne ka ziyaada sawaab hai.
Rasoolullah sallallahu alaihi wasallam ne farmaaya : jo shakhs meri ummat ke
fasad aur bigaad ke waqt meri sunnat ko mazbooti se pakde rahe, us ke liye
shaheed ka sawaab milega.
9- Rasoolullah
sallallahu alaihi wasallam ki sunnat ko apnaane mein hi hamaari taraqqi hai :
Ham mein se har
shakhs taraqqi karna chaahta hai, lekin taraqqi haasil karne ke liye ham Aap
sallallahu alaihi wasallam ki sunnat ko chhod kar doosre raaste apnaate hain
aur usi mein ham apni taraqqi khayaal karte hain, haalaanke koi musalmaan
sallallahu alaihi wasallam ki sunnat se munh mod kar taraqqi haasil nahin kar
sakta hai, khud sochiye ke jo shakhs Allah ke mahboob ki sunnat ko chhod de,
Allah usko kaise bulandi ata karega. Sahaaba e kiram Radihiallahu Anhu ne is
haqeeqat ko khoo samajh liya tha, ek martaba Rasoolullah sallallahu alaihi
wasallam ne Hazrat usman Radihiallahu Anhu ko ek paigaam pahochaane ke liye
makka bheje, woh Abbaan Bin Saeed ki panaah mein makka gaya, makka ke logon ki
yeh aadat thi ke woh takabbur aur ghamand mein apne kapdon ko takhne se neeche
latka kar ghaseet kar chala karte the, jab ke Rasoolullah sallallahu alaihi
wasallam ki sunnat yeh thi ke tehband ya paaijaama aadhi pindli tak ya kam se
kam takhne se upar rakha jaaye, Hazrat Usman Radihiallahu Anhu ka tehband aadhi
pindli tak tha, jab Abbaan Bin Saees ne unki yeh haalat dekhi to kaha :
Bhateeje! mein tum ko bahot aajizi waala dekh raha hoon, apna tehband thoda
neeche latka lo, jaise ke tumhaari qaum latkaato hain. Hazrat Usman
Radihiallahu Anhu ne usko do tok jawaab diya ke (nahin) hamaare Habeeb
sallallahu alaihi wasallam isi tarah aadhi pindli tak tehband rakha karte hain.
Phir aage chal kar us ne kaha : Bhateeje! (aaye ho to) Baitullah ka tawaaf kar
lo, Hazrat Usman Radihiallahu Anhu ne kaha : jab tak mere Habeeb sallallahu
alaihi wasallam yahaan koi kaam nahin kareinge, mein bhi nahin karoonga, ham
aap hi ke tareeq ko apnaeinge.
Dekhiye! Kis tarah
Hazrat Usman Radihiallahi Anhu ne Aap ki sunnat ko apnaaya, yahi haal tamaam
sahaaba e kiraam Radihiallahi Anhu ka tha, phir us ke nateeje mein Allah ne un
hazrat ko aisi shohrat, azmat aur buland ata ki ke saari duniya hairat zada hai.
10- Ilme deen kahaan
haasil karein :
Aaj ke daur mein ilme
deen seekhne ke bahot saare zariye hain, un hi mein se madaaris aur munazzam
makaatib hain, jo bahot hi aham aur deen ki seekhne zarooraton ko poora karne
waale hain, apne bachchon ko madaaris aur munazzam makaatib mein ilme deen
seekhne ke liye bhejein, taake shru hi se bachchon ka zahen aur mizaaj shareeat
wa sunnat ke mutaabiq dhale, aur phir woh apni poori zindagi us ke mutaabiq
guzaar sake. Aur jo mizaaj shareeat wa sunnat ke mutaabiq dhale, aur phir woh
apni poori zindagi us ke mutaabiq guzaar sake. Aur jo badi umar ke mard wa
aurat hain woh bhi rozaana kuvh waqt faarig kar ke munazzam maktab mein deen ki
buniyaadi baatein seekh sakte hain, kyun ke munazzam makaatib mein ummat ke
tabqe ko deen sikhaane ka intizaam hai.
https://islamicnabikisunnat.blogspot.in/
===================================================================
*_अल्लाह हमे अपने महबूब हुज़ूर सल्लल्लाहों अलैहि वसल्लम। के सदके इसी तरह इल्मे दीन सीखने समझने और अमल करने की तौफ़िक अता करे।_*
//आमीन//